२९ प्रतिशतले घट्यो आइसीएफसी फाइनान्सको खुद नाफा

काठमाडौं, १५ कात्तिक । चालू आर्थिक वर्षको पहिलो त्रैमासमा आइसीएफसी फाइनान्स लिमिटेडको खुद नाफा उल्लेखीय रुपमा घटेको छ ।

गत वर्षको सोही अवधिको तुलनामा यो त्रैमासमा २९ दशमलव ७९ प्रतिशतले कम हो । गत वर्ष पहिलो त्रैमाससम्म ४ करोड ७६ लाखभन्दा बढी नाफा गरेको कम्पनीले यस वर्ष ३ करोड ३४ लाखभन्दा बढी मात्र यो नाफा गरेको हो ।

गत वर्षभन्दा यस वर्ष कम्पनीको कर्मचारी खर्चसँगै अन्य खर्चहरू बढ्दा सञ्चालन नाफा घट्द गई खुद नाफामा समेत असर परेको हो ।

गत वर्ष ६ करोड ८० लाखभन्दा बढी सञ्चालन नाफा गरेको कम्पनीले यस वर्ष २७ प्रतिशत कम ४ करोड ९६ लाखभन्दा बढी मात्र यो नाफा गरेको हो । पहिलो त्रैमाससम्म कम्पनीको वितरणयोग्य नाफा भने ९ करोड ४३ लाखभन्दा बढी रहेको छ ।

हाल कम्पनीको चुक्तापूँजी १ अर्ब १२ करोड ७१ लाख १५ हजार छ भने जगेडा कोष रकम ५४ करोडभन्दा बढी छ । कम्पनीले गत वर्षभन्दा ३ प्रतिशत बढी अर्थात् १८ अर्ब २५ करोड ९३ लाख निक्षेप संकलन गरेको छ भने १ दशमलव २१ प्रतिशत कम अर्थात् १४ अर्ब १३ करोड २२ लाख कर्जा प्रवाह गरेको छ ।

गत वर्ष १ दशमलव ७८ प्रतिशत रहेको निष्क्रिय कर्जा यस वर्ष घटेर १ दशमलव ३१ प्रतिशतमा झरेको छ । पहिलो त्रैमाससम्मको वित्तीय विवरण अनुसार कम्पनीको प्रतिशेयर आम्दानी ११ दशमलव ८७ र प्रतिशेयर नेटवर्थ १५६ दशमलव ३२ रहेको छ ।